आपराधिक क्रियाकलाप रोक्न वैज्ञानिक स्रोतसाधनको सहजीकरण गर्दै संगठन सबलीकरण गर्न गृह मन्त्रालयले तयारी गरेको छ: गृहमन्त्री थापा

Posted by

चितवन, असार २२ – गृहमन्त्री राम बहादुर थापा ‘बादल’ले परिवर्तित अवस्थामा सूचना प्रविधिको प्रयोगबाट हुने आपराधिक क्रियाकलाप रोक्नका लागि नेपाल प्रहरीलाई आवश्यक पर्ने वैज्ञानिक स्रोतसाधनको सहजीकरण गर्दै संगठन सबलीकरण गर्न गृह मन्त्रालयले तयारी गरेको बताएका छन्।

जुनियर प्रहरी अधिकृत शिक्षालय, भरतपुरमा संचालित २-१७५औं समूहको प्रहरी सहायक निरीक्षक आधारभूत तालिमको सोही शिक्षालयमा आइतबार आयोजित दीक्षान्त समारोहलाई सम्बोधन गर्दै गृहमन्त्री थापाले उक्त कुरा बताएका हुन ।

गृहमन्त्री थापाले मुलुक संघीय संरचनामा गइसकेको अवस्थामा नेपाल प्रहरीलाई राज्य र आमनागरिकप्रति पूर्ण उत्तरदायित्व बहन गर्नेगरी सेवामुखी बनाउन, प्रहरी कर्मचारीको मनोबल उच्च राख्न, बृत्तिबिकासका अवसरलाई तदारुकताकासाथ कार्यान्वयन गर्न, प्रहरी सेवा नागरिक पहुँच र नागरिकमैत्री बनाउनका लागि गृह प्रशासन सुधार कार्ययोजना कार्यान्वयनमा आइसकेको उल्लेख गरे ।

राज्यको पुनःसंरचना र कानुनी रुपान्तरणका लागि राज्यले दिएको जिम्मेवारी मन, वचन र कर्मले सम्पादन गर्दै समाजका सिमान्तकृत वर्ग र समुदायलाई संरक्षण गर्न, अपराधवाट पीडितको संरक्षण र पिडकलाई कानुन बमोजिम दण्डित गर्नका लागि कटिबद्व हुन प्रहरी कर्मचारीहरुलाई उनले निर्देशन दिए ।कार्यसम्पादनको क्रममा स-साना वाधा र अडचनहरु स्वभाविक हुने हुँदा दीक्षित भईजाने नवप्रवेशी प्रहरी सहायक निरीक्षकहरुलाई आ-आफ्नो कार्यक्षेत्रमा आफूले सिकेका ज्ञान, सीप, कलालाई पूर्णरुपमा पालना गरी राज्यले दिएको जिम्मेवारीलाई सफलताका साथ सम्पन्न गर्न उनले शुभकामना दिए । सो अवसरमा गृहमन्त्री थापाले उत्कृष्ट प्रशिक्षार्थीहरुलाई पुरस्कार तथा प्रमाणपत्र र उत्कृष्ट प्रशिक्षकहरुलाई नगद पुरस्कार वितरण समेत गरे ।

समारोहमा धन्यवाद ज्ञापन गर्दै प्रहरी महानिरीक्षक सर्वेन्द्र खनालले प्रहरी सेवा विशुद्ध रुपमा एक ब्यावसायिक, अनुशासित एवं मर्यादित सेवा हो भन्ने भावनाले प्रेरित भई दीक्षित प्रहरी कर्मचारीले व्यावसायिक जीवनको यस खुशियाली क्षणमा गरेको प्रणलाई आत्मसात गरी हरेक प्रहर क्रियाशील रहेर नागिरक र प्रहरीबीचको सम्वन्धलाई प्रगाढ तुल्याउन लाग्नुपर्ने बताए ।
समारोहमा राष्ट्रिय प्रहरी प्रशिक्षण प्रतिष्ठान महाराजगंजका कार्यकारी निर्देशक प्रमुख प्रहरी अतिरिक्त महानिरीक्षक पुष्कर कार्कीले स्वागत मन्तव्य व्यक्त गर्दै प्रशिक्षार्थीहरुले सपथग्रहणको क्रममा लिएका प्रतिवद्वताहरु कदापी नविर्सिई कार्यक्षेत्रमा लाग्नुपर्ने बताए ।

उक्त अवसरमा उक्त शिक्षालयका निर्देशक प्रहरी नायव महानिरीक्षक हरिभक्त प्रजापतीले तालिम सम्बन्धी प्रतिवेदन प्रस्तुत गर्नुका साथै प्रशिक्षार्थीहरुलाई शपथ ग्रहण गराएका गराएका थिए । २०७५ साउन २७ गतेदेखि संचालित उक्त तालिममा ३ सय ५ जना प्रशिक्षार्थीहरुको सहभागिता रहेको थियो ।

जस मध्ये २८३ पुरुष २२ महिला रहेका थिए। प्रशिक्षार्थीहरुलाई उनीहरुका अभिभावकहरुले दर्ज्यानी चिन्ह सुशोभन गरेका थिए । समारोहमा जिल्ला समन्वय समिति चितवनका प्रमुख कृष्ण कुमार डल्लाकोटी, गृह मन्त्रालयका सल्लाहकारद्वय सूर्य सुवेदी र डा.ईन्द्रजित राई, चितवन जिल्लाका प्रमुख जिल्ला अधिकारी जितेन्द्र वस्नेत, निजामती, नेपाली सेना, नेपाल प्रहरी र शसस्त्र प्रहरी बलका वरिष्ठ अधिकृतहरु, संचारकर्मी, चितवन जिल्लास्थित विभिन्न कार्यालयका प्रमुखहरु, नागरिक समाजका प्रतिनिधिहरु, अमर प्रहरी परिवार, पूर्व प्रहरी कर्मचारीहरु, आमन्त्रित अन्य अतिथि एवं प्रशिक्षार्थीका अभिभावकहरु समेतको उपस्थिति रहेको थियो ।